Монда ашлык башлык

Тоташ алганда, быел Бүздәк элеваторы июль-октябрь айларында 15 мең тоннадан артыграк ашлык кабул иткән. Тапшыручы предприя­тиеләр арасында күпчелекне Бүздәк районы хуҗалык­лары тәшкил итә. Атап әйткәндә, “Нерал-Бүздәк” җәмгыяте, “Бүздәк” агрофирмасы быел да элева­торның ышанычлы партнерлары исемле­гендә, алар иң күп ашлык тапшыручылар санала. Күрше төбәкләрдән Чиш­мә, Кушнаренко районнары ашлык җитештерүчеләре дә Бүздәк элеваторын үз итә.
Әйткәндәй, ашлыкны файдалы шартларда урнаштыруга хәзер чикләр юк. Соңгы чорда, мәсәлән, ашлыкны Бүздәккә Казахстаннан китереп тә саклауга куялар. Элеватор директоры Алег Сакаев билгелә­венчә, ашлык хуҗалары өчен иң мөһиме – аның ышанычлы урында торуы, сыйфат күрсәт­кечләренең сакланышы. Ә бай тарихлы, техник мөмкин­лек­ләре киң Бүздәк элеваторы әлеге таләпләрне төгәл үтәве белән аерылып тора.

Эшкәртүче тармак пред­приятиесенең эшчән­леге табигать шартларына да нык бәй­ле. Быел, мәсәлән, сызма культуралардан көнбагыш мул уңыш белән куандырмады. Элек элеватор һәр елны 4-5 мең тонна көнбагыш кабул итсә, быел ул 937 тонна гына тәшкил итте. Аны, нигездә, район хуҗалыклары китерде.

Үзәк матбугат басмаларыннан белүебезчә, быел Русия чит илләргә зур гына күләмдә ашлык сатарга ниятли. Моның йогынтысы Бүздәк элеваторында да сизелә. Мәсәлән, хәзер ашлык, чын мәгънәсендә, хәрәкәттә, ягъни ул биредәге саклагычларда озак тоткарланмый. Атап әйткәндә, соңгы чорда бодай күпләп озатыла башлаган, аерым көннәрдә, графикка ярашлы, 100әр тонна төяп җибәрәләр хәтта. Шуңа бәйле, элеваторда мәшәкать­ләр дә арткан. Аларның зур өлеше ашлык сыйфатын билге­­ләүче лаборатория коллективына төшә, әлбәттә.

Гомумән, эшкәртү тармагы пред­приятиесе лабора­тория­дән башлана, диюләре дөрес­тер. Моның бе­лән лаборатория мөдире Эльвира Ханнанова да тулысынча килешә. Быел ашлыкка хаклар ярыйсы гына күтәрелде, аны чит илләргә чыгару бигрәк тә отышлы. Сүз, әлбәттә, сый­фат­лы ашлык турында бара. Ә аның хакында объектив белешмәне кулланучыларга лаборатория генә бирә.

Зур булмаган коллективка, моннан тыш, саклагычлардагы ашлыкның сыйфатына күзәт­челек тә йөкләтелгән. Шуңа да даими рәвештә анализлар алына, аларның нәтиҗәләре җентекле өйрәнелә һәм чаралар күрелә. Коллективта күпче­лекне тәҗрибәле белгеч­ләр тәшкил итә. Лаборантлар Гөл­сирин Мәүлетова, Мәрьям Кунафина һәм Светлана Сәфәр­галина — нәкъ шундыйлардан.

Республикадагы төрдәш­ләре арасында Бүздәк элева­торы үзенең ярма заводы бе­лән дә киң билгелелек казанды. Элег­рәк, атап әйткәндә, совет чо­рын­да, аның продукциясе тулысынча дип әйтерлек СССР Кораллы Көчләренең хәрби частьларына озатыла иде. Хәзер Бүздәк ярмасының бу юнәлештә кулланылыш даи­рәсе шактый тарайды, әлбәттә. Шуңа да карамастан, аңа их­тыяҗ шактый зур. Завод ок­тябрьдә эшкә кушылгач, шушы вакытта 718 тонна арпа ярмасы чыгарылган. Бу урында шуны да билгеләп үтик: ярма заводының җитештерү мөм­кин­лекләре шактый зурдан. Тулы куәтенә эшләткәндә, ул тәүлегенә 120 тонна продукция бирергә сәләтле. Хәзерге вакытта исә бер сменада эшли, көненә 25-30 тонна ярма җи­теш­терә. Продукция Башкортстан төбәкләренә, шулай ук, Тольятти, Чиләбе һәм Санкт-Петербургка җибәрелә.

Элеваторның баш бухгалтеры Зәлифә Исхакова әйтүен­чә, коллектив үзенә йөкләтел­гән бурычларны намус белән үтәп килә. Әлеге вакытта район үзәгендә иң эреләрдән саналучы предприятиедә алтмыштан артык кеше эшли.