“Колос”та башаклар тулышуын көтәләр

Сөтчелек фермасы, трактор паркы, ындыр табагы Татар-Олкан бүлекчәсендә урнашкан. Бер мең баш мөгезле эре терлекнең 220се — савым сыеры. Фермада барлык эшләр дә механикалаштырылган. Мал азыгы җитәрлек әзерләнә. Бүлекчәдә орлык фонды һәм фураж ашлыгы туплана. Филиал карамагын­дагы 15 мең гектардан артык сөренте мәйданнарның 6 мең гектары — Туймазыда, 5 мең­нән артыгы — Шаран районында. Бүздәк бүлекчә­сендә, нигездә, техника ре­монтлау һәм аны саклау цехлары эшли. Дәүләкән районындагы 3 мең гектар җирләрне дә алар эшкәртә.

— Узган ел Туймазыда чәчү мәйданнарыбыз 730 гектарга артты. Фермага якын­рак басуларны арттыруны максат итеп куябыз, — ди филиал директоры Альмир Гыйма­ев. — 129 кешене эшле итәбез. Язгы-көзге чорда алар 300дән артып китә.

Альмир Гыймаев – хезмәт юлын шушы предприятиедә башлаган, барлык баскычларны үтеп, эшнең нечкәлек­лә­ре­нә төшенгән, четерекле мәсьә­ләләрне күреп белгән яшь җи­тәк­че. Бәлки шуңадыр да коллективка яшь кадрлар җәлеп итүгә җитди карый ул. Собханкул агросәнәгать колледжы белән 7 ел элек башланган элемтә тагын да ныгыган. Тракторчы-машинист һөнәрен сайлаган егетләр иртә язда пред­приятиенең ремонт цехында практика үтә. Үзләрен яхшы яктан күрсәткәннәрен җәйге­леккә эшкә чакыралар. Бүген “Колос” карамагындагы 15 чап­кычның дүртесендә студентлар эшли. Һәр агрегатны икешәр егет хезмәтләндерә. Әлбәттә, басуга чыгар алдыннан алар тәҗрибәле механизаторларда стажировка үтә, бераз күнек­мә­ләр алгач, мөстәкыйль эшли башлыйлар. Һөнәргә өйрәтү мастеры Хаматнур Маннанов та егетләр белән бергә басу иңли. Печән чоры тәмамлан­гач, ашлык уру комбайнына утыручылар да бар. Хезмәт чиреге укучылар өчен тәҗрибә туплау гына тү­гел, яхшы керем алу мөм­кин­леге дә.

— Ел саен төркемдәге 20 кешенең 2-3е бездә эшкә кала, — ди Альмир Разит улы.

Биредә эшләүче 4-5 яшь гаиләгә ел саен авылны үстерү программасы буенча торак төзүгә яисә сатып алуга дәүләт субсидиясе бүленүе турында да горурлык белән сөйли җи­тәкче.

Филиал шикәр чөгендере игү белән ныклы шөгыльләнә. Быел ул 750 гектарда чәчел­гән, шуның 300е – Туймазыда, калганы – Шаранда. Без барганда химик утауның соңгы гектарларын тәмамлыйлар иде. Бүген инде печән хәзер­ләү тулы куәтенә бара. Бу чорда предприятие Туймазы районындагы хуҗалыкларның 60 процентына хезмәт күрсәтә. “Колос” егетләре Шаран, Бә-ләбәй, Благовар, Ярмәкәй районнары басуларында да эш-ләп кайта. Печән чорында, һава шартларына бәйле рә­вештә, хуҗа­лык­ларның зурысы да, кеч­кенәсе дә бердәй яр­дәм сораса, уракта нигездә вак фермер­лар хезмәтлән­дерелә. Предприятие, әлбәттә, вакытында булышырга ашыга. Чөгендер алуда да Туймазы һәм күрше районнар хуҗа­лыкларына яр­дәмләшергә өлгерәләр.