+14 °С
Болытлы
Гәзиткә язылуVKOKTelegram
Барлык яңалыклар
Авыл хуҗалыгы
25 август 2016, 02:00

Икенче икмәк кадере

“Салават” агрофирмасында яшелчә саклагыч булдырып, киләчәктә бәрәңгене ел дәвамында сатуга чыгарырга ниятлиләр.Быел, көннәр эссе торгангамы, җиләк-җимеш, яшелчә иртә һәм тиз өлгерде. Стәрлетамак районының “Салават” агрофирмасында бәрәңге дә ала башлаганнар. Җәмгыять җитәкчесе Наил Баһаветдинов, аның урынбасары Радмир Әскаров әйтүенчә, хуҗалык басуларында бәрәңгенең иртә өлгерә торган “Ароза”, “Королева Анна” дигән сортларын утыртканнар. Суны махсус җайланмалар ярдәмендә сиптергәннәр. Юкса быелгы корылыкта бәрәңге уңышы бик түбән булыр иде.

Бәрәңгене утырту, рәт араларын эшкәртү, сугару, алу, төяү тулысынча техника көче белән башкарыла. Уңышны җыю өчен өр-яңа комбайн алганнар. Әлеге көннәрдә тәүге центнерлар складларга кайтарылган. Махсус җиһаз бәрәң­гене үлчәме буенча сортларга аерырга сәләтле. Ләкин ки­селгән, авыру бәрәңгеләрне чүпләү, тутырылган капчыклар­ны күчерү өчен кул көчен кулланмыйча булмый. Бу эш участогында – унөч, кайбер көн­нәрдә унбиш кеше эшли икән. Без килгәндә Миңнегөл Галимова, Ирина Огава, Флүзә Сөлекбаева, Земфира Вахитова, Айнур Вахитов, Филарет Галимов, Мансур Сөлекбаев, Вилә Әсмәндия­рова һәм башка уңганнар кызу эш белән мәшгуль иде. Сатуга чыгары­лачак бәрәңге капчыкларга тутырып куелган.

Баш икътисадчы Альбина Баһаветдинова әйтүенчә, ху­җалыкта бөртеклеләрнең 80 проценты җыеп алынган, ур­тача уңыш һәр гектардан 31,4 центнер тәшкил итә. Әле силоска кукуруз уру бара, аның уңдырышлылыгы – гектарыннан 194 центнер. Бәрәңгене сәүдә челтәренә чыгару өчен килешүләр төзелгән. Дөрес, бу эш гади генә түгел, чөнки алдан ук сертификатлар булдырырга, яшелчәгә анализ үткәрергә кирәк.

Гомумән, хуҗалык киләчәк­тә яшелчәчелеккә игътибарны арттырырга уйлый. Бу максатта элекке складларның берсен яшелчә саклагыч итеп җиһаз­ландырмакчылар. Аның өчен җилләткеч кайтарылган да инде. Яшелчә саклагыч булганда, бәрәңгене сатуга ел дәвамында тәкъдим итеп булачак.
Читайте нас: