-14 °С
Болытлы
Гәзиткә язылуVKOKTelegramЯRus
Барлык яңалыклар
Авыл хуҗалыгы
22 сентябрь 2016, 02:00

Маллар көр кышлар

Чөнки Әлшәй районының “Заря” хуҗалыгында җаваплы чорга җитди әзерлек белән киләләр.“Заря” хуҗалыгы игенчеләре бөртекле культураларны урып-җыюны районда беренчеләрдән булып тәмамлады. Баш агроном Рамин Гайнетдинов әйтүенчә, гектар куәте 20 центнер тәшкил иткән. Корылыклы ел өчен начар күрсәткеч түгел. Уҗым культуралары быел да сынатмаган. Уҗым бодае, мәсәлән, гектардан 25-30 центнер уңыш белән куандырган.

Ике ел элек хуҗалык орлыкчылыкка махсуслашкан иде. Биредә, алдынгы техноло­гияләргә таянып, бөртекле­ләрнең элита сортларын җитештерүгә юнәлеш алынды. Нәтиҗәлелеккә сынауны алар хуҗалык басуларында үтә. Өметләр акланды, дип ышанычлы әйтергә мөмкин. “Экада” сортлы бодайдан, мәсәлән, быел да мул уңыш алынган. Ихтыяҗ зур булган әлеге сорт орлыгы хуҗалыкта 100 тонна тупланган.

Хәзер хуҗалык механизаторлары алдында торган төп бурыч — кукуруз һәм шикәр чөгендере уңышын җыеп алу. Татлы тамыр 200 гектарда үстерелгән. Аны казып алуга, электән килгән гадәт буенча, октябрьдә керешмәкчеләр. Шушы максатта техника әзерләүгә зур игътибар бирелә, авыл хуҗалыгы машиналарының һәркайсы җентекле ремонт үтә.

Ә кукуруз уңышын җыеп алу күптән башланган инде, “яшел урак”та катнашучы механизаторларның төп максаты итеп кышлатуга җиткелекле күләмдә силос хәзерләү.

Хуҗалыкта бер мең баштан артык сыер малы асрала, шу­ның 300е — савым сыеры. Әйткәндәй, сөт терлекче­ле­гендә “Заря”ның хезмәт уңыш­лары район дәрәҗәсендә күп­тән билгеле. Үткән елгы кышлату йомгакларыннан күре­нүен­чә, биредә һәр сыердан 4150 килограмм сөт савып алынган. Ирешелгән күрсәт­кечне “Заря” терлекче­ләре быел да кабатлар, дигән ныклы ышаныч бар. Баш зоотехник Мирас Сафин әйтүенчә, җәй­ләү чоры сөт җитештерүдә шактый уңышлы булган. Тоташ алганда исә, 9 айда һәр сыердан 3 мең килограмм тирәсе сөт савып алынган. Хәзерге чорда да малларның продуктлылыгы югары булып кала. Тәүлеклек савым, мәсәлән, 14 килограмм тәшкил итә, бу һәр көнне 4 тон­­на тирәсе сөт сату мөм­кинлеге бирә.

Силоска тәгаенләнгән кукуруз быел 350 гектарда үсте­релгән. Уңышны җыеп алу максатында, башка еллардагы кебек, быел да механикалаштырылган отряд оештырылган. Аңа 6 берәм­лек техника керә. Кукуруз чабуны “Дон-680” комбайнында Нәфис Сибәга­туллин алып бара. Яшел массаны ташуга тракторлар һәм “КамАЗ” машиналары — җәмгысы биш берәм­лек техника җәлеп ител­гән. Бай тәҗри­бәле механизатор Радик Хаҗимө­хәммәтов аеруча өлгерлек күр­сәтә. Басудан силос базына һәр көнне ким дигәндә 18-20 рейс ясый уңган тракторчы. Яшел масса ташуда шоферлар Халит Латыйпов һәм Равил Батталов та тырышып эшли.

Механика­лаш­ты­рыл­ган отряд­ның хез­мәт җитеш­те­рүчәнлеге югары. Бер атна дигәндә, мәсәлән, 100 гектарда уңыш җыелып, 2 мең тонна силос салынган. Бу төр сусыл мал азыгы хәзерләүдә төп максат — 6 мең тонна. Әлеге чорда һәр гектардан 180 центнер яшел масса алынуын исәпкә алганда, моңа ирешә­чәкләр.

Баш зоотехник әйтүенчә, кышлату чорына һәр малга 32 центнер азык туплау бурычы тора. Бу җәһәттән 700 тонна печән хәзерләнгән һәм саклагычларга куелган.

Гомумән, “Заря” кышлатуга яхшы әзерлектә килә, дип ышанычлы расларга мөмкин. Быел, мәсәлән, терлекчелек биналарын яңарту буенча зур эш башкарылган. Әбдрәшит сөтчелек фермасын таныр­лык түгел: ихатаны яңа койма белән уратып алганнар, абзар түбәләре заманча материал белән ябыл­ган. Бер терлекчелек бинасы яңабаштан ремонтланган. 80 баш малга исәп­ләнгән абзарда сыерлар бозаулату цехы урнашачак. Гомумән, күп эшләр механикалаштырылган, сөтүт­кәргеч корылган. Уңайлы эш шартлары тудырылган ферма заманча төс алган. Шуңа да биредә малларның көр кышлаячагына, сөт җитештерүнең ки­мемәвенә шикләнмәскә мөм­кин.
Читайте нас в