Җир асты суларын тоючы Беккер

Шулай итеп, компания җитәкчелеге анда скважина борауларга карар итә. Моның өчен башта тиешле тикшеренүләр үткә­релә, урын сайлана һәм җиһаз-корылмалар урнаштырыла. Нәкъ менә шул вакытта Д. Беккер җи­тәкчелеккә бу урында бораулаучыларның су таба алмаячагын әйтә, якынча 50 метр тирән­лектә бераз су чыгачагы, аның да тозлы булачагы хакында белдерә. Ләкин аның бу сүзләрен игътибарга алмыйлар, тиешле тик­шеренүләр үткәрелүе турында әйтеп, авызын йомалар.

Үз сүзләрен сүз итеп, скважинаны барыбер шул урында бораулагач кына Д. Беккерның хаклы бул­ганлыгы раслана. Бер­никадәр вакыт узгач, җитәкчелек әлеге “сәер хезмәткәр”не исенә тө­шерә һәм “сулы” урын табып бирүен үтенә. Җир асты суларын эзләүчеләр элек тә булган һәм моның өчен алар, гадәттә, талчыбыклар файдаланган. Әмма Беккерга бернинди чыбыклар да кирәк булмый, ул, кулларын күкрәк турысында кушырып, компания территориясе буйлап акрын гына әрле-бирле йөренә башлый.

Якынча ярты сәгать шулай йөренгәч, ул туктый һәм фирма хезмәткәр­ләренә шул урынны билгеләргә куша. Бу вакытта Беккерның бөтен тәне калтырануына бө­тенесе дә игътибар итә. Шуннан соң ул арытаба китә һәм гәүдәсе тагын дерелди башлаганчы йө­ренә. Яңа урын берен­чесеннән 500 метр арырак була. Монысын да билгеләп куялар. Әмма фирма җитәкчелеге Бек­керның бу “ачышларын” шарлатанлык дип бәяли һәм әлеге экспериментны хәзер инде күзләрен бәйләп кабатларга мәҗбүр итә. Ләкин бу хәлдә дә ул башта билгеләнгән урыннарда туктала. Барыбер шик­ләнсә дә, җитәкчелек шунда бораулап карарга рөхсәт бирә. Һәм, ни гаҗәп, беренче скважинадан ук чыккан су шулкадәр күп була, икенчесен бораулап та тормыйлар.

Д. Беккер үз сәләтен моңа кадәр дә файдаланган була. Ул шәһәрдән 30 чакрымда, корылыклы төбәктә туып-үсә. Анда яшәүче фермерлар сулы урын таба алса гына уңышлы эшчәнлеккә исәп тота ала, шунлыктан алар электән Беккерның карт­әтисенә мөрәҗәгатъ иткән була. Нәкъ менә ул оныгын әлеге ысул белән су табарга өйрәтә дә инде.

Ләкин онык картәтисен дә уздырып җибәрә: ул кайда су барлыгын гына ачыклап калмый, суның төче яисә тозлы булуын да әйтеп бирә ала. Моның өчен ул тимер акчалар файдалана, эзләү барышында бер учына – көмеш, икенчесенә бакыр тәңкә кысып тота. Әгәр су төче булса, көмеш акчалы кулы бик каты калтырана башлый, тозлы булса – бакыр тәңкәлесе.

Бу искиткеч сәләтне галимнәр дә аңлатып бирә алмаган. Менә шундый инде ул Ходай бәндәсе – үзе бер могҗиза!