“Язганнары – күңел түреннән саркылган хәзинә!”

Язучылар һәм Журналистлар берлекләре әгъ­засы, хезмәт ветераны Светлана Васикованың бу беренче генә китабы тү­гел, аның үзнәшер юлы белән “Такыямдагы чәчәкләр”, “Сандугачлы, җырлы-моңлы бакчам”, “Чыгырлы кое”, “Төсләр балкышы”, “Гомер балдагы”, “Хәтер яктылыгы”, “Сүнмәс йолдыз”, “Моң илчесе”, “Исемеңне ташка уйдым” китаплары дөнья күрде. Иҗат җимешләре “Китап” нәшриятында чыккан “Акчарлак-2014” альманахында, балалар өчен җыентыкларда басылды. “Базы кызы” исә быел З. Бии­шева исемендәге “Китап” нәшриятында дөнья күрде.
Светлана Фәүзи кызы Дүр­төйле шәһәрендә Наҗар Нәҗ­мигә багышланган шигырь фестивалендә лауреат булды, Роберт Миңнуллин иҗаты буенча бәйгедә җиңеп, “Тал бишек” фондының дипломы белән бүләкләнде. Бәләбәй шәһәрендә үткәрелгән “Илһам чишмәләре” төбәкара шигърият фестива­ленең “Мәхәббәт лирикасы” номинациясендә җиңү яулады.
Иҗат кешесе өчен әсәрләрен ташка бастыруның, аларны укучысына тәкъдим итүнең никадәр зур сөенеч булуын үзе каләм тибрәткәннәр яхшы аң­лый. Светлана Фәүзи кызы­ның шатлыгын уртаклашып, Казаннан килгән мәртәбәле кунак – Бөтендөнья татар хатын-кыз­ларының “Ак калфак” оешмасы җитәкчесе Кадрия Идрисова аның иҗатын югары бәяләде. Светлана ханымның ихлас, чагу шигырьләре күңелнең иң нечкә кылларын тибрәтә, тормыш мәгънәсе, рухи кыйммәтләр хакында уйланырга мәҗбүр итә, дип билгеләде ул. Моннан тыш, Кадрия Рәис кызы Светлана Васиковага, милләтебез алдындагы фидакарь эшчәнлеген искә алып, туган телебезне, татар халкының рухи мирасын саклау һәм үстерүгә багышланган хез­мәтләре өчен Бөтендөнья татар конгрессы Башкарма комитеты­ның Рәхмәт хатын һәм истәлек­ле бүләген тапшырды.
“Базы кызы” җыентыгында Светлана Фәүзи кызының соңгы елларда язылган шигырьләре тупланган. Аларда — шагый­рәнең туган ягыбызга булган сөюе дә, фәлсәфи уйланулары да, йөрәк әрнүләре дә, шатлыклары да. Әсәрләреннән яз яктылыгы бөркелә, алар ихласлыгы белән күңелне яулый.
“Җыр теләгән күңелләргә
Моң орлыгын үттем чәчеп.
Язмышыма рәхмәтлемен,
Җырың калу – үзе бәхет.
Олы бәхет...” – дип яза “Моң орлыгы” шигырендә Светлана Фәүзи кызы. Нинди гади һәм шул ук вакытта үз эченә зур хакыйкатьне сыйдырган сүзләр!
Шагыйрәнең иҗат җимеш­ләрен чарада “Раушан” клубы әгъзалары сәнгатьле укып ишеттерде. Ә Светлана ханым үзе­нең Салават Әхсәнов көйгә сал­ган “Мәхәббәт моңы” дигән җырын башкарып, кичәгә кабатланмас ямь өстәде.
Авторны яңа китабы белән шагыйрь Венер Фәттахов, Дүр­төйледә күп еллар уңышлы эшләп килүче “Дулкын” әдәби иҗат берләшмәсе әгъзалары һәм башка бихисап шәхесләр тәбрикләде. Һәркем аңа җылы теләкләрен җиткерде.
“Базы кызы” җыентыгында шагыйрәнең иң якын кешелә­ренә – балаларына, мәрхүм әти-әнисенә, чәчәктәй чагында гомере өзелгән сәхнә йолдызы Айсылу апасына багышланган шигырьләре дә урын алган.
Балаларыңа тәрбияне сүз белән генә түгел, гамәлләрең белән күрсәт, ди аксакаллар. Бу җәһәттән дә Светлана Фәүзи кызын үрнәк итеп куярлык: ул әти-әнисен картайган көннә­рендә һәрчак курчалап, ярдәм күрсәтеп яшәде. Бөек Ватан сугышында катнашкан, урын өсте­нә калган әтисен җиде ел олы хәстәрлек белән тәрбияләп, зурлап соңгы юлга озаткан игелекле бала ул.
Ярты гасырга якын сәхнә стажы булган Светлана Фәүзи кызының милләтебезнең килә­чәгенә битараф түгел шәхесләр­дән икәнлеген, яшь буынны чын милләтпәрвәрләр итеп тәрбия­ләү өлкәсендә армый-талмый хезмәт салуын ассызыклады кичәдә катнашучылар. Балалар бакчаларында, мәктәпләрдә ул еш кунак, үсеп килүче буын күңелендә туган телебезгә, күркәм гореф-гадәтләребезгә сөю уяту өчен вакытын да, сәләтен кызганмый, диде алар.
Халкыбызның йолаларын, борынгы җыр-моңнарын терге­зү, яшь буынга җиткерү юлында да шагыйрә киң колачлы эш­чәнлек алып бара. Бу җәһәттән Светлана ханымның Дүртөйле районының данлыклы “Әллүки” халык фольклор ансамбле һәм “Ак калфак” оешмасы бүлекчәсе җитәкчесе икәнлеген әйтеп үтү урынлы булыр. “Әллүки” өч дистә еллап туган халкыбызга хезмәт итсә, “Ак калфак” районда өч ел элек барлыкка килде, әмма шуңа карамастан, бихисап күркәм проектларда катнашып, зур сәхнәләрдә чыгыш ясап өлгерде дә инде.
Светлана Фәүзи кызы иҗат­ка, сәнгатькә мөкиббән шәхес, аның бихисап шигырьләренә җырлар язылган, аларны таныл­ган артистлар башкаруында татар-башкорт телеканалларында ишетергә була. Матбугатта туган ягыбыз тарихына, данлы улларына багышланган мәкалә­ләре еш күренә. Үзе белем алган Илеш районының Этәй авылы урта мәктәбе белән дә элемтә­ләрне өзми ул. Үз исемендәге премия булдырып, ел саен мәк­тәпнең иң яхшы укучысы һәм спортчысына тантаналы рә­вештә бүләк тапшыра. Бу чараны Этәй мәктәбе укучылары ел саен көтеп ала, чөнки ул зур бәйрәмгә әверелә.
“Әллүки” ансамбленә һәм “Ак калфак” бүлекчәсенә Светлана Васикова үзе кебек бөтен яктан булдыклы, җыр-моңга маһир ханымнарны туплаган. Алар составында пенсионер апалар гына түгел, мәктәп уку­чылары да бар. Китапның исем туенда әллүкилеләр дә, ак калфаклылар да чыгыш ясады, дәртле итеп татар халык җыр­ларын башкарды. “Әллүки”­нең яшь йолдызлары София Сәе­това, әйткәндәй, ул Светлана ханымның оныгы, һәм Ландыш Гарифуллина да искиткеч җыр-моңнарын яңгыратты, өздереп скрипкада уйнады. Зал алар­ның чыгышларын көчле алкышларга күмде. “Халкыбыз иҗаты­на гашыйк, мондый нечкә зәвыклы яшьлә­ребез бул­ганда татар моңы яшәр, вакыт чоңгы­лында югалмас! — дип сөенеп куйгандыр чал чәчле тамашачылар.
Бөтендөнья татар хатын-кызларының “Ак калфак” оешмасы җитәкчесе Кадрия Идрисова Дүртөйле бүлекчәсенең эшчәнлеген күпләргә үрнәк итеп куйды. Аның белдерүенчә, мил­ләт язмышы гаиләгә, бигрәк тә әниләргә, дәү әниләргә бәй­ле. Светлана Фәүзи кызы кебек, балалары, оныклары белән үз туган телебездә сөйләшүче, күңелләрендә кечкенәдән халкыбыз мәдәниятенә ихтирам, кызыксыну уятучы әниләр һәм дәү әниләр булганда, миллә­тебез югалмас, дип йомгаклады ул сүзен.

Шул ук вакытта...
Светлана Фәүзи кызы үзе­нең фикер­дәшләре, иҗатташ­лары – “Әл­лү­ки” халык фольклор ансамбле әгъзаларының барысына да “Кызыл таң” канаты астында нәшер ителүче “Тулпар” журналына ярты еллык подписка бүләк итте. Әфа­рин!

Миләүшә Латыйпова,
“Кызыл таң”ның үз хәбәрчесе.
Дүртөйле
районы.

Фото: М.Латыйпова