Сабыйлар сәламәт булсын!

20 ел гомерен яңа туган балалар сәламәтлегенә багышлаган медицина фәннәре кандидаты, югары категорияле табиб-неонатолог Фәйрүзә Латыйповага да күп еллар тынгы бирми бу уйлар. Шуңа Фәйрүзә Мөнәвәр кызы яңа туган балаларны сәламәт­лендерү буенча методика, “Үзенчә­лекле балалар” проекты эшли. Һәм менә 12 майда аның максаты тормышка аша — “Сөекле сабый” абилитация үзәге ачыла. Үзәкнең девизы — мәхәббәт белән, авыртусыз дәва­лау. Максаты — балаларда инвалидлык булдырмау.

— Кайсы гына социаль чел­тәр­не ачма — ата-аналар балаларына ярдәм сорап ялвара. Бу ялваруның инде мәгъ­нәсе бар микән? Бала сәла-мәт­леге хакында ул туганчы уйла­на башларга кирәк, — ди та­биб, үзәкнең директоры Фәй­рү­зә Мөнәвәр кызы.

“Сөекле сабый”га кемнәр мөрә­җәгать итә ала? Җитлек­мичә туган, катлаулы опера­ция­­ләр кичергән, реанимация үткән, генетик авырулары булган балаларның ата-аналары. Алар белән сөйләшкәч, баланы тик­шер­гәч, карар кабул ителә: сабыйга биредә дәвалану ки­рәкме, юкмы? Үзәктә дәва­лау курсы үтү якынча 30 мең сум тәшкил итә. Ә Чиләбедә, мәсә­лән, шундый ук үзәктә дәва­лану — 250 мең сум... Фәйрүзә Латый­пованың максаты — киләчәктә са­бый­ларны бушлай дәвалауны булдыру.

Үзәктә балалар белән логопедлар, психологлар, физио­терапевтлар һәм башка бел­геч­ләр шөгыльләнә. Сабый­лар­га массаж, гимнастика курслары үткәрелә. Белгечләр балалар белән шөгыльләнгән арада әниләргә чәй эчеп, ял итеп алу мөмкинлеге бар.

— Төп принцип — зыян китер­мәү. Безнең методика гипоксия һәм ми зарарлану йогынтысын минималь­ләш­те­рергә ярдәм итә. Яңа туган баланың мие пластиктай, аның зарарланмаган урыннары зарарланган урыннарның функциясен үзенә алырга мөмкин. Вакытны гына кулдан ычкындырмаска кирәк, — ди Фәйрүзә Латыйпова. — Максатыбыз — инвалидлыкны булдырмау.

“Елның балалар табибы — 2010”, “Башкаланың казанышы — 2012” , Русия педиатрлары Берлеге конкурсында җиңүче республикадагы бердәнбер педиатр ул Фәйрүзә Мөнәвәр кызы, үзе дә — күп балалы ана. Матур башлангычында табибка уңышлар телисе килә.