Тип, йөрәгем, туктама...

Аорта — иң төп һәм зур артериаль кан тамыры. Аның катламнарга бүленүе — еш очрамаучы, шулай да бик куркыныч авыру. Оператив медицина ярдәме күрсәтелмәгән очракта, әлеге патология булган пациентларның илле проценты беренче тәүлектә үк үлә. Соңгы унике елда Республика кардиология үзә­гендә аорта аневризмасы булган 150 кеше дәва­ланган, шулар­ның утызында аортаның кискен катламнарга бүленүе күзәтелгән. Бу очракта кешенең гомерен саклап калу өчен бик катлаулы, авыр операция эшләргә кирәк, гадәттә, аортаның башлангыч бүлеге протезга алмаштырыла.
Соңгы операциянең уни­кальлеге аның гибрид юл белән эшләнүендә, бу очракта, стандарт методикага өстәмә итеп, ачык аортага видеокүзәтү астында металл стенд урнаштырыла, ул каркас рәвешендә аның эчен ныгытып тора. Бу тактика хәзер дөньяның иң яхшы кардиохирургия клиникаларында актив кулланыла, безнең республика да шундый операцияләр эшләү буенча Русиянең биш төбәге исәбенә керде.
Бу уңайдан Республика кардиология үзәгендә жур­налистлар белән очрашу үтте. Үзәкнең баш табибы Ирина Николаева кешеләрнең яшәү сыйфатын яхшырту өчен нинди чаралар кирәклеге турында сөйләде. Моның өчен барлык структураларны да җәлеп итү, профилактика, яңа техно­логияләрне үстерү һәм яхшы реабилитация кирәклеген әйтте.
— Безнең үзәктә елына сигез меңнән артык операция ясала, елдан-ел яңа техно­логияләр өйрәнелә, — ди баш табиб урынбасары Богдан Олейник.
Табиблар аорта аневриз­масының “астыртын” авыру булуы турында әйтте, озак вакыт үзен сиздерми килеп, кинәт үлемгә китерергә мөмкинлеген дә билгеләде. Еш кына аны миокард инфаркты белән дә бутыйлар икән. Шуңа һәммәсен дә диспансеризация үтәргә, йөрәк авырулы кешеләрне махсус тикшеренергә чакырдылар.
Уникаль операцияне башкарган кардиохирург Владимир Сурков пациентның бүген үзен канәгатьләнерлек хис итүен әйтте.