Кәгазьдә — бушлай, гамәлдә — түләүле

“Кесәдән” дәвалану

Быел үземә дә хастаханәдә ятып чыгарга туры килде. “Моңарчы безне хезмәтлән­дергән клининг компаниясе алышыну сәбәпле, бер-ике атна дәваланучылар урын-җир кирәк-яракларын өйдән алып килергә тиеш. Үзегез белән алдыгызмы?” — дип каршы алдылар. Юк, әлбәттә, алма­дым, аның кирәк буласын кем белгән инде. Ялт кына кайтып, төянеп килдем. Палатага урнаштым. Табиб обход белән керде. Дәвалану курсы өчен дарулар язды да, “Хастаха­нәдәге аптекадан алмагыз, монда кыйммәт. Яныгызга кем килеп йөриячәк — алар башка җирдән алып килсә, арзанга төшәр”, — диде. Кыскасы, миңа монда бушлай дару да юк. Ярый, бәлки минем диагноз сирәктер, андыйларга дарулары да юктыр дип уйлап куйдым. 10 көн шулай үз түшәгемдә, үз даруларым белән “дәвалан­дым”. Анализ­лар бирү, УЗИ үтү дә үз “кесәмнән”. Палатадашла­рым да, күрше палаталарда ятканнар да нәкъ шулай дәвалана. Шулай тиештер дип, аны-моны уйламый, дәва­лануны дәвам иттем.
Күптән түгел җәмәгать транспортында ике бабайның сөйләшүен тыңлап барам. Берсенең карчыгын мин яткан хастаханәгә салганнар икән. “Карчыгыма урын-җир кирәк-яраклары белән дарулар илтәм”, — дип, сәфәренең сәбәбен хәбәр итте. Икенче бабайга бу сүзләр ошамады: “Нинди кирәк-яраклар һәм дарулар ул? Бездә медицина бушлай. Үз хокук­ларыңны белергә кирәк”, — дип сүгеп ташлады аны.
Бабайның ачулы сүзләре мине уйга салды. Бушлай медицина булганын белә торып, нишләп үз акчама дәва­ландым икән?! Аннары, мин дәваханәдә ятып чыкканга ярты елдан артык вакыт үткән, “теге” клининг компаниясе һаман алы­шына микәнни? 1-2 атна гына мондый хәл дип әйткәннәр иде, димәк, ул ел буена бара?

Тиеш нәрсә күп булса да...

Закон буенча, стационарда дәваланучылар өчен барлык медикаментлар да бушлай бирелергә тиеш. Әгәр стацио­нарда дәваланганда ниндидер дарулар яки башка кирәк-ярак алына икән, чекларны һичшик­сез саклагыз. Киләчәктә сез үз полисыгызга караган медицина страховкалау оешмасына барып, шул чекны күрсәтеп, барлык чыгымнарны да кире кайтара аласыз. Ләкин бу моментны көтмичә, страховкалау оешмасына шунда ук мөрәҗәгать итсәгез, яхшырак булыр.
Законны белгән очракта, һәр бәхәсле мәсьәләне үз файдабызга хәл итү мөм­кинлеге бар. Полиста күрсә­телгән телефон номеры буенча тәүлек әйләнәсендә консуль­тацияләр алырга була.
Әгәр пациентта “Росгосстрах” полисы икән, 8 (347) 299-30-10 номерына шалтыра­тып, ул үз зарларын шунда ирештерә ала. Андагы белгеч­ләр хастаханә хакимияте белән элемтәгә кереп, дәвалану­чының проблемаларын булдыра алганча хәл итәргә тыры­шыр. Кирәк булса, хәтта страховкалау компаниясенең җи­тәкчелеге үзе үк бу эшкә ачыклык кертә алыр. “Росгосстрах” компаниясенең граж­даннарның хокукларын саклау бүлеге хезмәткәре Гөлнара Исламова сүзләренчә, күп очракта кешеләрнең мөрә­җәгатьләре буенча тиешле чаралар күрелеп, мәсьәләләр уңай чишелеш таба.
Әлеге телефон номеры буенча мин дә шалтыратып, дәвалау курсы буенча ризасызлыгымны белдердем. Гаеп үземдә: хастаханәдә ятканда ук шалтыратасы булган. Мин сатып алган дарулар да, УЗИ тикшеренүләре дә бушлай булырга тиеш. Әгәр дә бүген кулымда чеклары сакланган булса, страховкалау компаниясенә барып, үзем яткан хастаханәгә шикаять калдырып, чыгымнарны кире кайтара алыр идем.
— Сезнең дәвалану курсын без тулысынча үз өстебезгә алабыз, страховкалау компаниясе барысы өчен дә түли. Ә урын-җир кирәк-яраклары ту­рында сүз дә юк, анда бернинди клининг компаниясенең дә алышынуы мөмкин түгел. Вакытында шалтыраткан булсагыз, барысын да уңай хәл иткән булыр идек, — диде Гөлнара Исламова.