Никотин — мәкерле агу

Никотин — кеше организмына начар тәэсир итә торган агу. Ул “авыр” түгел, ләкин аның мәкере дә шунда. Организм бу матдәгә әкрен күнегә, шуңа да тартуны теләгән вакытта ташлап була дигән хыял белән яши. Ләкин тәмәке шунда ук организмга җимергеч тәэсир итә башлый.

Тәмәке тартучының үп­кә­се куе кызыл-кара бер массаны хәтерләтә, чөнки бер тәмәкедә 4 меңнән артык зыянлы матдә бар. Әмма төп йогынтыны өч матдә: сумала, никотин һәм агулы газ кушылмалары ясый.

Тәмәке куллануның нәтиҗәләре аянычлы: үпкә рагы, шикәр диабеты, инсульт, йөрәк чире... Тәмәке­нең зарарлы булуы турында барысы да белсә дә, яман гадәттән арынырга әзер түгелләр, чөнки бу җиңел түгел. Ул бик катлаулы һәм озайлы процесс. Ләкин моны җиңеләйтүче киңәшләр бар. Әйтик, кайбер продуктларны куллансаң, тәмәке тартмау җиңелрәк биреләчәк.

Су организмнан зыянлы матдәләрне чыгара. Шуңа күрә табиблар күб­рәк сыекча эчәргә киңәш итә.
Сөт зыянлы һәм агулы матдәләрне эретергә һәм чыгарырга сәләтле. Сөт ризыклары куллану организмда тупланган зарарлы матдә­ләрдән котылырга ярдәм итә.

Тәмәке тартуның тагын бер нәтиҗәсе — организмда С витаминының тиз таркалуы. Цитруслардан ясалган сут бу витаминны тергезергә һәм организмга никотинга каршы торырга ярдәм итә. Шуңа күрә тиешле күләмдә әфлисун, киви, лимон, карлыган кулланырга кирәк.

Сельдерей тәмәкенең тәмен “бозарга” сәләтле яшелчә, дип исәпләнелә. Моннан тыш, ул кан басымын нормальләштерә, никотинга бәйлелекнең кимүенә булышлык итә һәм кан тамырлары торышын яхшырта. Яшел тәмләткечнең бу сыйфаты кешегә яман гадәттән котылуны җиңеләйтәчәк.